Täjirçilik maksady bilen harytlar Türkmenistandan alnyp gidilende (eksport edilende), gümrük edaralaryna berilmäge degişli resminamalaryň sanawy şulardan ybaratdyr:
1. Daşary ykdysady geleşik
Aşakdaky eksport edilýän harytlar boýunça baglaşylan geleşikler Türkmenistanyň Döwlet haryt-çig mal biržasynda bellige alynmaga degişlidir:
- döwlet eýeçiligine degişli edara görnüşli taraplaryň harytlary;
- döwlet eýeçiligine degişli bolmadyk edara görnüşli taraplardan we hususy telekeçilerden, ilatdan satyn alan, bahasy kanunçylykda bellenen möçberden köp bolan harytlar.
2. Täjirçilik resminamalary:
- hasap-faktura (inwoýs);
- ýükläp ugradyş, gaplaýyş listleri we beýleki resminamalar.
3. Geleşigiň pasporty — bahasy erkin aýlanýan puluň çäginden, ýagny kanunçylykda bellenen möçberden köp bolan harytlar üçin berilýär.
4. Ulag (daşaýyş) resminamasy — awtoulag serişdesinde daşalanda halkara ýol-ulag resminamasy (CMR), demir ýol ulag serişdesinde daşalanda halkara demir ýol-ulag resminamasy, deňiz gämisinde daşalanda konosament, howa gämisinde daşalanda awia ýol-ulag resminamasy.
5. Türkmenistanyň kanunçylygynda bellenilen çäklendirmeleriň berjaý edilmegini tassyklaýan rugsat beriji resminamalar:
- maldarçylyk önümleri üçin weterinariýa sertifikaty;
- gelip çykyşy ösümlikden bolan önümler üçin fitosanitar sertifikaty;
- sungat eserleri (şekillendiriş grafikasy, žiwopisi), gadymy arheologik zatlar hem-de çeperçilik,taryhy, ylmy we medeni gymmaty bolan beýleki zatlar üçin Türkmenistanyň Medeniýet ministrliginiň rugsady;
- elde dokalan haly we haly önümleri üçin «Türkmenhaly» döwlet birleşiginiň güwänamasy (netijenamasy);
- Türkmenistanyň kanunçylygynda bellenilen ýagdaýlarda, degişliligi boýunça başga rugsat beriji resminamalar.
6. Harydyň gelip çykyşyny tassyklaýan güwänama (deklarasiýa):
- Türkmenistanda öndürilen harytlar üçin harydyň gelip çykyşyny tassyklaýan güwänama;
- daşary ýurtda öndürilen harytlar üçin Türkmenistana getirilende resmileşdirilen ýük gümrük deklarasiýasy.
7. Daşary ykdysady işiň haryt nomenklaturasy boýunça harytlaryň toparlara bölüniş koduny tassyklaýan resminamalar:
- harydyň doly beýany görkezilen täjirçilik resminamalary;
- öndürilende berlen laýyklyk sertifikaty;
- tehniki resminamalar we hil pasporty.
8. Eksport edýän şahs hakyndaky maglumatlary tassyklaýan resminamalar:
- kärhananyň esaslandyryş resminamasy (tertipnamasy);
- hususy telekeçiniň bellige alyş şahadatnamasy;
- Türkmenistanyň ýuridik şahslarynyň ýeke-täk döwlet sanawyndan göçürmesi;
- daşary ykdysady işe gatnaşyjynyň şahadatnamasy (kiçi we orta telekeçiligiň subýektlerine — güwänama);
- eksport edýän şahsyň harytlara bolan ygtyýarlygyny tassyklaýan resminamalar.
9. Bellenilen tertipde doldurylan ýük gümrük deklarasiýasy.
10. Gümrük tölegleriniň tölenilendigini tassyklaýan resminama.
Çeşme: Kuwwat Çaryýew hukukçy.
“Rysgal” gazetiniň 29-njy maýda çap edilen sany
